د افغانستان د اوبو او انرژۍ وزارت په کابل کې د ځمکې لاندې اوبو پر وضعیت اندېښنه څرګنده کړه او ویې ویل چې دغه اوبه تراوسه سمې نه دي کنټرول شوي.
د دې وزارت یوه چارواکي اصف غفوري نن ازادي راډیو ته وویل چې د دغې ستونزې اصلي علت په غیرقانوني توګه له ځمکې لاندې اوبو څخه استفاده ده.
هغه وویل چې د دغې ستونزې د لېرې کولو لپاره یې د اوبو د زیاتولو او هم په مصنوعي ډول د ځمکې لاندې اوبو ته د اوبو ورتېرولو پروژې پیل کړې دي.
نوموړي وویل چې په کابل کې د اوبو د ډنډونو جوړولو لپاره هم هڅې ګړندۍ شوي او د شاه او عروس بند په بشپړېدو به دغه ستونزه تر ډېره هواره شي.
د دغه بند د جوړېدو کار په سلو کې ۸۰ مخ ته تللی چې په کابل کې به د یونیم ميلیون خلکو د اوبو ستونزه هواره کړي.