د ناټو عمومي منشي وايي چې یو شمېر طالب مشران ښايي د سولې د خبرو لپاره تیاری ولري.
ینس سټولټنبرګ دا څرګندونې پرون پنجشنبې په بروکسل کې د ناټو په مقر کې د ناټو د ۲۰۱۷ میلادي کال د فعالیتونو د راپور د وړاندې کولو پر مهال وکړې.
ښاغلي سټولټنبرګ په خپلو خبرو کې د افغانستان د کړکېچ د سیاسي حل پر اړتیا ټینګار وکړ او د سولې لپاره د افغان حکومت نوي وړاندیز ته د اشارې په ترڅ کې یې پر وسلهوالو طالبانو غږ وکړ چې له دې فرصته ګټه واخلي او خبرو ته کیني.
نوموړي زیاته کړه:
"د ولسمشر غني دا اقدام چې طالبان یې بې له کوم قید و شرطه خبرو ته رابللي دي؛ هرکلی کوو. دا تر دې دمه د سولې لپاره تر ټولو پیاوړی غږ وو. طالبان باید له دې فرصته د سولې د خبرو لپاره کار واخلي او سیاسي حللاره ومني. که ټول طالبان نهوي، نو د هغو ځینې کسان خو به خامخا د سولې خبرو ته چمتو وي او موږ له همدې کسانو غواړو چې دا کار وکړي."
د ناټو عمومي منشي ینس سټولټنبرګ
د امریکا دفاع وزیر جېمز مټېس هم له دې مخکې ویلي و چې د طالبانو یو شمېر مشرانو له افغان حکومت سره د سولې خبرو ته لېوالتیا ښودلې.
مټېس دا څرګندونې د سې شنبې په ورځ هغو خبریالانو ته وکړې چې کابل ته د ده د ناڅاپي سفر پر مهال په الوتکه کې ورسره وو.
ښاغلي مټېس وویل چې په افغانستان کې بریا لا هم ممکنه ده، خو د ناټو عمومي منشي ښاغلي سټولټنبرګ په خپلو څرګندونو کې پر وسلهوالو طالبانو د فشار د زیاتولو یادونه وکړه او د افغان ځواکونو د پیاوړتیا پر اړتیا یې هم ټینګار وکړ.
ښاغلي سټولټنبرګ زیاته کړه:
"پوهېږو چې د جګړې په ډګر کې د روان حالت او د سولې د خبرو ترمنځ نژدې اړیکه شته، نو باید افغان ځواکونه پیاوړي کړو، څو د جګړې په ډګر کې روان ولاړ حالت مات کړي او طالبانو او نورو وسلهوالو ډلو ته دا پیغام ورسوي چې د جګړې په ډګر کې د هغو بریا ممکنه نهده. نو ځکه موږ په افغانستان کې خپل پوځي حضور په دې وروستیو کې پراخ کړی، څو افغان ځواکونه په دې وتوانېږي چې اوسنی ولاړ حالت مات او د سیاسي حللارې لپاره امکانات برابر کړي."
ناټو تېرکال وپتېیله چې په افغانستان کې د خپلو پوځیانو شمېر له ۱۳ زرو څخه شاوخوا ۱۶ زرو ته لوړ کړي.
وسلهوالو طالبان دې جګړه بنده کړي او له افغان حکومت سره دې د سولې خبرې وکړي.
افغان ولسمشر اشرف غني درې اوونۍ مخکې د کابل د پروسې په دوهمه غونډه کې د سولې لپاره یوه نوې طرح وړاندې کړه او یو ځل بیا یې وسلهوالو طالبانو ته بې قید او شرطه بلنه ورکړه چې له افغان حکومت سره د سولې خبرو ته کېني.
په افغانستان کې د امریکا او ناټو د ځواکونو عمومي قوماندان د چهارشنبې په ورځ طالبانو ته خبرداری ورکړ چې که له حکومت سره د سولې خبرو ته کېنني، نو د دې ډلې پر مرکزونو ځمکنۍ او هوايي حملې به زیاتې شي.