د پاکستان صدراعظم شاهد خاقان عباسي وايي، نړۍ دې له پاکستانه د افغان کډوالو د بېرته ستنولو او په خپل هېواد کې یې د ځای پر ځای کولو په لړ کې خپلې ژمنې پوره کړي.
دا په داسې حال کې ده چې د پاکستان حکومت د روان کال د جنورۍ په لومړۍ نېټه په پاکستان کې د مېشتو افغان کډوالو د اوسېدو موده د یو میاشت او بیا وروستهیې د فبرورۍ په لومړۍ نېټه دا موده دوه میاشتې نوره وغځوله.
د راپورونو له مخې، په پاکستان کې دا مهال تر ۱.۴ میلیونو ډېر راجسټر افغان کډوال مېشت دي چې د پاکستان، افغانستان او د کډوالو لپاره د ملګرو ملتونو د نړیوالې ادارې «UNHCR» د درې اړخیز تفاهم وروسته ورته په دې هېواد کې د اوسېدو قانوني اسناد ورکړل شوي دي.
د پاکستان د صدراعظم دفتر په یوې خپره کړې خبرپاڼه کې ویلي چې د دې هېواد صدراعظم د سې شنبې په ورځ د مرکزي حکومت د کابینې په غونډه کې پر نورو مساېلو سربېره په پاکستان کې د افغان کډوالو پر موضوع هم تفصیلي خبرې کړې دي.
د پاکستان صدراعظم خاقان عباسي
که څه هم تېره اوونۍ په رسنیو کې داسې راپورونه خپاره شوي وو چې ګواکې د پاکستان حکومت په دغه هېواد کې د مېشتو افغان کډوالو د اوسېدنې موده د روان کال د جون میاشتې تر پایه په غڅولو غور کوي، خو د صدراعظم خاقان عباسي دفتر په خپله خبرپاڼه کې ویلي:
"پاکستان حکومت پرېکړه کړې چې له پاکستانه بېرته ستنېدونکو راجسټر افغان کډوالو ته به هر ډول اسانتیاوې برابرې کړي او په دې اړهیې په بېلابېلو سپارښتنو غور کړی دی."
د پاکستان د مرکزي حکومت کابینې همدا شان ټینګار کړی چې نړیواله ټولنه دې هم د افغان کډوالو په ارام او خوندي بېرته ستنېدنه کې خپلې ژمنې پوره کړي.
د پاکستان سیاسي او پوځي مشران په دې وروستیو کې ټینګار کوي چې افغان کډوال دې پر خپله خوښه په پرده کې هېواد ته ستانه شي.
پاکستان کې افغان کډوال
د پاکستان د پوځ مشر جنرال قمر جاوید باجوه د روانې اوونۍ په پیل کې د جرمني د مونیخ په امنیتي کنفرانس کې ادعا کړې وه چې حقاني شبکه او پاکستاني طالبان پاکستان کې د افغان کډوالو له کمپونو د خپلو موخو لپاره ګټه اخلي او اوس دا وخت رارسېدلی چې دغه کډوال په عزت خپل هېواد ته ستانه شي.
The United States has foolishly given Pakistan more than 33 billion dollars in aid over the last 15 years, and they have given us nothing but lies & deceit, thinking of our leaders as fools. They give safe haven to the terrorists we hunt in Afghanistan, with little help. No more!
— Donald J. Trump (@realDonaldTrump) January 1, 2018
د پاکستان سیاسي او پوځي مشرانو تر هغې وروسته له دغه هېواده د افغان کډوالو پر ستنېدو ټینګار زیات کړی چې د امریکا ولسمشر ډونالد ټرمپ د روان کال په لومړۍ نېټه د ترهګرۍ پر ضد جګړه کې په دوه مخۍ تورن کړی او بیا وروستهیې دغه هېواد ته پوځي مرستې هم وځنډولې.