د اسرائیل صدراعظم او د ایران د بهرنیو چارو وزیر پرون یکشنبه په یوه مهمه نړیواله غونډه کې لفظي شخړه وکړه.
د اسرائیل صدراعظم بنیامین نتانیاهو د ایران په وړاندې سخته انتقادي ژبه وکاروله او دا هېواد یې په سوریه او یمن کې د یاغي وسلهوالو په ملاتړ تورن کړ.
نتانیاهو چې د لومړي ځل لپاره د مونیخ په نړیواله امنیتي غونډه کې وینا کوله، د ایران رژیم د دوهمې نړیوالې جګړې په کلونو کې د جرمني له فاشیستي نظام سره یو شان وباله او ویېویل چې دا هېواد د نړۍ لپاره یو لوی خطر دی.
هغه د ایران رژیم د نړیوالې سولې لپاره یو ګواښ وباله او له نړیوالې ټولنې یې وغوښتل چې پر وړاندې یې ودرېږي.
نتانیاهو د مونیخ امنیتي غونډې په دوهمه او وروستۍ ورځ چې د ګڼ شمېر هېوادونو مشران او چارواکي، پالېسي جوړوونکي او کارپوهان پهکې حاضر وو، له ایران سره د لویو قدرتونو اټمي موافقه هم وغندله او ویېویل چې دې موافقې ایران په کورنۍ او نړیواله کچه لارې ته سم نهشو کړای.
نتانیاهو یوه وسپنه چې ویل یې د ایران د یوې نسکورې شوې بېپیلوټه الوتکې ترلاسه شوې پرزه ده، د ایران د بهرنیو چارو وزیر جواد ظریف ته وروښوده او پوښتنهیې وکړه، دا پېژنئ؟ دا ستاسو ده.
هغه ظریف په لومړي نوم یاد کړ او د هغه پر وینا یې انتقاد وکړ.
نتانیاهو زیاته کړه:
"ظریف وايي چې د سوریې او یمن کړکېچ پوځي حل لاره نهلري. که دا رښتیا وي، نو ایران ولې دقیقاً په همدې دوو هېوادونو کې د جګړې اور ته وسلې او جنګیالي استوي. بې له شکه چې ښاغلی ظریف به بیا هم په سوریه کې د ایران شریرې لاسوهنې په سپینسترګۍ سره رد کړي."
خو د ایران د بهرنیو چارو وزیر جواد ظریف هم د کنفرانس ګډونوالو ته په وینا کې نتانیاهو ته په تُندو الفاظو ځواب ورکړ او د هغه وینا یې د سرکس نندارې ته ورته وبلله.
د ایران د بهرنیو چارو وزیر جواد ظریف
ښاغلي ظریف زیاته کړه:
"تاسو نن سهار د یوه کارتون ډوله سرکس نندارچیان وئ، داسې چې حتی د ځواب ویلو د مرتبې وړتیا هم نهلري."
د ایران او اسرائیل په اړیکو کې کړکېچ تېره میاشت وروسته له هغه زیات شو چې د اسرائیلو یوه جنګي جټ الوتکه په سوریه کې د ایران او سوریې پر پوځي اهدافو له برید وروسته د ستنېدو پر مهال وویشتل شوه او نسکوره شوه.
د ایران د بهرنیو چارو وزیر په خپله وینا کې همداراز په منځني ختیځ، عراق او افغانستان کې د ښکېلېدو په خاطر د اسرائیلو پر متحد هېواد امریکا هم سخت انتقادونه وکړل.