د افغانستان د کرنې او مالدارۍ وزارت وايي، په هېواد کې د جلغوزیو کلنی تولید نېږدې ۲۳ زره ټنو ته رسېدلی دی.
د دغه وزارت ویاند اکبر رستمي نن دوشنبه ازادي راډيو ته وویل چې اوسمهال په پکتیا، پکتیکا او خوست ولایتونو کې پر ۴۳ زره هکتاره ځمکه د جلغوزیو په ونو پوښل شوې ده.
ښاغلی رستمي وايي، د جلغوزیو حاصلات د قناعت وړ او په ملي او نړیوالو بازارونو کې په مناسبه بیه پلورل کېږي.
د کابل ښار په بازارونو کې يوه کیلو جلغوزي ۸۰۰ افغانۍ بیه لري.
د ښاغلي رستمي په خبره، د ۲۳ زرو ټنو جلغوزیو ټولیز ارزښت له ۴۵۰ زرو امریکايي ډالرو پورته دی او دغه وزارت هڅه کوي چې د پروسس د مرکزونو په جوړولو سره د جلغوزیو ارزښت لا لوړ شي.