د بدخشان ولایت د جرم ولسوالۍ په درهای خستک او په راغستان ولسوالۍ کې د داعش ډلې ځای پر ځای کېدل او د دغې ډلې لهخوا د ځوانانو د جلب و جذب بهير د بدخشان اوسېدونکي او مدني فعالان سخت اندېښمن کړي دي.
د هغوی د خبرو پر بنسټ، بهرني جنګیالي چې زیات شمېر یې داعش ډلې پورې تړاو لري، د پاکستان د چترال له لارې بدخشان ته را اوړي او اوسمهال د دې ولایت په ځینو سیمو کې د پټنځایونو جوړولو او د ځوانانو پر جلب و جذب بوخت دي.
دیني عالم مولوي محبالله شریفي
د دې ولایت یو تن دیني عالم مولوي محبالله شریفي په دې اړه ازادي راډيو ته وویل:
"داعش ډلې دلته خپل فعالیت پیل کړی او اوسمهال په وردوج ولسوالۍ کې او د جرم ولسوالۍ په درهای خستک سیمه کې د جلب و جذب په حال کې دي، خو زموږ دولتي ځواکونه په خپلو پوستو کې د دفاع په حالت کې دي او د دولت ضد عناصر پر وړاندې کوم تعرضي تحرک نهلري."
د دوی په وینا چې اوسمهال د جرم ولسوالۍ په درهای خستک سیمه کې څه باندې ۴۰۰ تنه بهرني جنګیالي له خپلو کورنیو سره اوسېږي او دغه بهرني جنګیالي له داعش سره ارتباط لري.
مدني فعال وحیدالله شیون
د نوموړي ولایت یو تن مدني فعال وحیدالله شیون هم د بدخشان امنیتي وضعیت په اړه ازادي راډیو ته وویل:
"د دې ولایت دوه لیرې پرتې ولسوالۍ د طالبانو په واک کې دي، خو دولت د دغو ولسوالیو بېرته نیولو په اړه کومه جدي اراده نهلري، موږ پر مرکزي حکومت او د بدخشان پر سیمهییزې ادارې غږ کوو چې له افریقايي خوبه وېښ شي او لږ د دې ولایت روان حالت وڅارئ."
بلخوا د بدخشان د ولایتي شورا یو غړی عبدالله ناجي نظري بیا وايي، ترڅو چې په دې ولایت کې د وسلهوالو مخالفینو او په ځانګړې توګه د بهرنیو جنګیالیو مرکزونه لهمنځه ولاړ نهشي، نو د بدخشان سربېره په شمال ختیځ ولایتونو کې امنیت او ثبات راوستل ناشونی کار دی.
د بدخشان د ولایتي شورا یو غړی عبدالله ناجي نظري
دی وايي:
"د جرم ولسوالۍ د خستک دره د بهرنیو جنګیالیو له مهمو مرکزونو شمېرل کېږي او ترڅو چې دغه مرکز لهمنځه ولاړ نهشي همدارنګه د دوی د تګ راتګ سرحدي لارې ونهتړل شي، موږ په سیمه کې د ډاډمن امنیت خاوندان نهشو کېدای."
په ورته وخت کې د بدخشان والي احمد فیصل بیکزاد، په دغه ولایت کې د داعش ډلې فعالیت او شتون ردوي او تأییدوي چې په دغه ولایت کې له څو کالو راهیسې څه باندې ۲۰۰ بهرني جنګیالي شتون لري او په بېلابېلو برخو کې داخلي طالبانو ته روزنه ورکوي او د دولتي ځواکونو پر وړاندې هم جنګېږي.
د بدخشان والي احمد فیصل بیک زاد
دی وايي:
"بدخشان یو غرنی ولایت دی او بهرني جنګیالي له تېرو څو کلونو راهیسي په دې ولایت کې ځای پر ځای شوي دي او د داخلي طالبانو تر څنګ د افغان ځواکونو پر وړاندې جنګېږي، خو موږ په وار وار خپلې اندېښنې له مرکزي حکومت سره شریکې کړې دي او هغوی هم په جریان کې دي."
خو د بدخشان اوسېدونکي او د مدني ټولنو فعالان بیا وايي، څه باندې دوه کاله کېږي چې د دغه ولایت د وردوج او یُمګان ولسوالۍ د وسلهالو مخالفینو تر واک لاندې دي او سربېره پر دې په ۷ نورو ولسوالیو کې هم وسلهوال طالبان شتون لري، خو دولت لا د دې ولایت د ناامنه سیمو د پاکولو په اړه کوم جدي اقدام نهدی کړی.
بلخوا د بدخشان والي بیا وايي چې مرکزي حکومت د دې ولایت د ناامنه سیمو د پاکولو په اړه جدي اراده لري او په نږدې راتلونکي کې د دغه ولایت په کچه د دولت ضد عناصرو پر وړاندې پراخ پوځي عملیات پیلېږي.
بدخشان د افغانستان په شمال ختیځ کې موقعیت لري او د پرېمانه طبيعي زېرمو او کانونو تر څنګ له چین، پاکستان او تاجکستان سره هم ګډه پوله لري چې له کبلهیې د کانونو او د نشهيي موادو د قاچاق وړونکو او د ترورېستي ډلو پام هم ځان ته جلب کړی دی.
راپور: اجمل ارین