په ایران کې نن یکشنبه حکومت د ټولنیزو رسنیو دوه مشهور وېبسایټونه بند کړل، څو اعتراض کوونکی ونهشي کولای چې د ټولنیزو رسنیو په مرسته د سبا لپاره اعتراضي غونډې تنظیم کړي.
دا په ایران کې په ۲۰۰۹ میلادي کال کې د جمهوري ریاست د انتخاباتو پر ضد د ایران د ولس تر پاڅون وروسته، لومړی وار دی چې دومره زیات خلک د حکومت پرضد اعتراض پېلوي.
په ایران کې هغو کسانو چې پر انسټګرام او ټلېګرام فعالیت لري، ویلي چې دواړه انټرنیټي وېبسایټونه له کاره لوېدلي دي. انسټګرام او ټېلګرام دواړه په ایرانیانوکې ډېر مشهور دي.
په ایران کې د حکومت پرضد په پراخو اعتراضونو کې تر اوسه د دوو تنو د وژل کېدو خبر تأیید شوی دی.
ایران حکومت مظاهرهچیانو ته خبرداری ورکړی چې که له قانون څخه سرغړونې ته دوام ورکړي، بیه به یې پرې کړي او ځواب به یې ورکړ ل شي.
په ایران کې پر ټلېګرام د "صدای مردم" په نوم برخه کې یو میلیون او درې لکه وګړي غړیتوب لري او په ایران کې د اپوزېسیون د نظرونو یوه ستره مجموعه یې جوړه کړې ده.
په تهران کې د روانو اعتراضونو یوه عیني شاهد د ازادي راډیو د فارسي برخې خبریالانو ته ویلي چې امنیتي ځواکونو اجازه نهده ورکړې چې خلک د تهران پوهنتون مخکې را غونډ شي.
ویل کېږي چې په تهران پوهنتون کې د اسلامي رژیم د پلویانو، بسیجي محصلانو جلسه روانه وه. په ایران کې د پنجشنبې په ورځ د اعتراضونو لړۍ له مشهده پېل شوه.
په ابتدا کې خلکو د نرخونو د لوړېدو له امله شکایتونه کول، خو وروسته یې اعتراضونه زیات شول او د رژیم پرضد اوازونه هم په کې وارېدل شول.
د ایراني رسنیو په حواله، د هغه هېواد د کورنیو چارو وزیر نن اعتراض کوونکو ته خبرداری ورکړ چې له قانون څخه د سرغړونې بیه به پرې کړي.
رپوټونه وايي چې د ایران په ختیځ ښار «دورود» کې دوه اعتراض کوونکي د مظاهرو ضد پولیسو په ډزو کې وژل شوي دي. په یو شمېر ښارونو کې اعتراض کوونکي پولیسو نیولي دي.
د امریکا ولسمشر ډونالډ ټرمپ د ایران رژیم ته خبرداری ورکړی چې د اعتراض کوونکو پر ضد دې له زوره کار نهاخلي او پر ټوېټر یې لیکلي: "نړۍ درته ګوري!"