د کندهار ښار په پنځمه امنیتي حوزه کې د بهرنیو ځواکونو پر موټریز کاروان په ځان وژونکي موټر بم حمله کې یوه ښځه وژل شوې او ۷ نور ملکیان کسان ټپیان شوي دي.
بل خوا په سیمه کې عیني شاهدانو ازادي راډیو ته ویلي چې ملکیانو ته دغه مرګ ژوبله د یوه کور د چت د نړېدو له امله چې د چاودنې ځای ته نېږدې و، رامنځته شوې ده.
د ازادي راډيو خبریال محمدصادق رښتینی د پېښې له ځایه دا راپور برابر کړی دی.
د دې راپور د اورېدو لپاره لاندې لېنک کېکاږئ:
Your browser doesn’t support HTML5
د کندهار راپور
پخواني معلومات:
د کندهار ښار د پنځمې امنیتي حوزې اړوند د ښور اندام په سیمه کې پر بهرنیو ځواکونو موټر بم انتحاري حمله شوې ده.
د کندهار امنیه قوماندان ازادي راډیو ته وویل چې په دې حمله کې یوه ښځه وژل شوې او ۵ ملکیان ټپیان دي.
امنیه قوماندان جنرال عبدالرازق په دې انتحاري حمله کې د بهرنیو ځواکونو د تلفاتو په اړه معلومات نهلري.
دی وايي، حمله هغه وخت شوې چې د بهرنیو ځواکونو کاروان له سیمې تېر شوی وو.
د ازادي راډیو خبریال چې په سیمه کې دی وايي، د سرف ډوله موټر ټوټې پرتې دي او سیمه د امنیتي ځواکونو له لوري کلابنده شوې ده.
دی وايي، دا حمله هغه وخت شوې چې ۵ ملکيان په دې سیمه کې پلي روان وو.
بلخوا عیني شاهدانو د ټپیانو شمېر ۷ تنه ښودلی دی.
د ناټو د قاطع ملاتړ ماموریت ویلي چې د دغې حملې په اړه څېړنه کوي.
دغه ځان وژونکې حمله په داسې وخت کې کېږي چې د امریکا دفاع وزارت کانګرس ته په شپږ میاشتني راپور کې په جګړه کې د افغان ځواکونو بریا ستایلې ده.
په دې راپور کې چې د ډسمبر په ۱۵مه کانګرس ته استول شوی، د افغان او امریکایي سرچینو په حواله ویل شوي چې د جګړې دغه فصل د تېر فصل په نسبت، ډېر بریالي وو.
تر اوسه د دې پېښې پړه کومې وسلهوالې ډلې نهده منلی.
- پخواني معلومات
په کندهار کې پر بهرنيو ځواکونو ځان وژونکي حمله شوې ده.
جرئیات وروسته....