د برېښنایي تذکرو په اړه د ولسمشر د تقنیني فرمان لپاره د ملي شورا د دواړو جرګو له خوا يو ګډ کمېسيون جوړ شوی چې په دې اړه به خپله پرېکړه د دوشنبې په ورځ اعلان کړي.
د دغه کمېسيون غړي محمد هاشم ارتاق د شنبې په ورځ ازادي راډیو ته وویل چې په دغه کمېسون کې د دواړو جرګو اته اته وکیلان شامل دي چې د برېښنايي تذکرو په اړه به د ولسمشر پر تقنیني فرمان بحث او خبرې کوي.
ولسمشر په خپل تقنیني فرمان کې لیکلي وو چې په تذکرو کې د افغان او اسلام د کلیمې ترڅنګ، باید د ملت یا قومیت کلمه راوړل شي.
د ولسمشر دغه تقنیني فرمان د افغانستان د مشرانو جرګې له خوا تائید، خو د ولسي جرګې له خوا رد شو.