د افغانستان ولسي جرګې د بیت المقدس په اړه د امریکا د ولسمشر ډونالد ټرمپ پرېکړه وغندله.
ولسي جرګې نن شنبه د یوې ځانګړې اعلامیې په خپرولو سره د ملګرو ملتونو سازمان له سرمنشي وغوښتل، څو په دې برخه کې بېړنۍ غونډه راوغواړي.
د دغې جرګې غړي عبدالقيوم سجادي د اعلامیې یوه برخه داسې ولوسته:
"د ملګرو ملتونو سازمان له سرمنشي او د امنیت شورا له داېمي غړو غواړو، څو د یوې بېړنۍ غونډې په رابللو سره دا فرمان وڅېړي او د لغوه کېدو لپاره جدي ګامونه واخلي."
تر دې وړاندې د افغانستان د جمهوري ریاست په ګډون بېلابېلو افغان چارواکو په دې اړه بېلابېل غبرګونونه ښودلي دي.
همدارنګه تېره ورځ د کابل په ګډون د هېواد په ډېرو ولایتونو کې هم د ټرمپ د پرېکړې پرضد مظاهرې وشوې.
دا غبرګونونه وروسته له هغه پورته شول چې د امریکا د متحده ایالاتو جمهور رئیس اعلان وکړ چې بیت المقدس د اسرائیلو د پایتخت په توګه په رسمیت پېژني او د دغه هېواد سفارت به له تل ابیب څخه بیت المقدس ته انتقال کړي.