د افغانستان د مالیې وزیر تېره ورځ د اسیا پراختیایي بانک له رئیس سره د څه باندې ۴۴ میلیونه ډالرو په ارزښت، د لمریزې برېښنا د سټېشن د جوړولو تړون لاسلیک کړ.
د مالیې وزارت ویاند اجمل حمید عبدالرحیمزي نن دوشنبه ازادي راډیو ته وویل چې د دغې پروژې له مخې به د سروبي ولسوالۍ په نغلو سیمه کې د ۲۰ مېګا واټه په ظرفیت د شبکې دننه د لمریزې برېښنا یو سټېشن فعال شي.
ښاغلي عبدالرحیمزي وویل:
"دغه پیسې د سروبي په نغلو سیمه کې د ۲۰ مېګا واټه لمریزې برېښنا د جوړولو په برخه کې لګول کېږي."
نوموړی وایي، د دغې پروژې په بشپړېدو سره به په کابل او جلالاباد کې د برېښنا د کمښت ستونزه تر یوه بریده هواره شي.
د لمریزې برېښنا د تولید دغه سټېشن به د یوه کال په اوږدو کې نږدې ۶۵۴۳۰ مېګا واټه لمریزه برېښنا تولید کړي.