په کندهار کې پرون شنبه «۱۳۹۶ کال لیندۍ ۰۴» د درملو جوړولو د یوې فابریکې او د خوراکي موادو او درملو د معیار د کتنې لپاره د یوه عصري لابراتوار د جوړېدو کار پېل شو.
له کندهاره د ازادي راډیو د خبریال په حواله، پر دواړو پروژو به لږ تر لږه ۱۸ میلیونه ډالر ولګېږي.
د افغانستان د عامې روغتیا وزیر فېروز الدین فېروز پرون شنبه «۱۳۹۶ کال لیندۍ ۰۴» په کندهار کې د دواړو پروژو د پېل غونډې ته وویل چې دواړه پروژې په یو نیم کال کې جوړېږي او سلګونه افغانانو ته به د کار موقع پېدا شي.
فېروز الدین فېروز وویل:
"د خوراکي موادو، درملو او نورو طبي موادو د کنټرول لابراتوار جوړېدل یو اساسي کار دی، ځکه ټول افغانستان ته ۵۰ فيصده دوا د کندهار له لارې راځي."
د عامې روغتیا وزیر پرون شنبه «۱۳۹۶ کال لیندۍ ۰۴» د کندهار ښار په میرویس روغتون کې د پښتورګو یا بډوډو د معاینې ځانګړی مرکز هم پرانېست.
دا په افغانستان کې د بډوډو د درملنې دوهم ستر مرکز بلل شوی دی.