د کندهار ولایت د کرنې او مالدارۍ ریاست وايي، سږ کال د انارو او انګورو په صادراتو کې د پام وړ زیاتوالی راغلی دی.
د دغه ادارې رئیس سید حفيظ سعیدي نن ازادي راډيو ته وویل چې سږ کال په کندهار ولایت کې ۸۰ زره ټنه انار له باغونو راټول شوي چې ۱۶ زره ټنه يې هندوستان او پاکستان ته صادر شوي.
ښاغلی سعیدي وايي، د انګورو حاصلات هم نېږدې سل زره ټنه و چې ۷ زره ټنه يې هندوستان، پاکستان او دوبۍ ته صادر شوي دي.
د نوموړي په خبره، د کندهار ولایت انار او انګور په کابل، بلخ، ننګرهار، هرات او يو شمېرو نورو ولایتونو کې هم ښه بازار لري.