په ترکیه کې د ۲۴۳ ښځینه افغان پولیسو روزنه د چهارشنبې په ورځ "۱۳۹۶ کال د لیندۍ ۰۱" پیل شوه.
دا تعلیمي دوره څلور میاشتنې ده.
په ترکیه کې د تېرو څو کلونو په ترڅ کې نږدې ۳۰۰۰ افغان پولیس روزل شوي دي.
د افغانستان د کورنیو چارو وزارت وایي چې حکومت پلان لري چې د ښځینه پولیسو شمېر ۱۰ زرو ته ورسوي او تر اوسه ۳۶۰۰ پولیسې شته.
دغې شمېرې ته د رسېدو لپاره د کورنیو چارو د وزارت پلاوي ولایتونو ته سفرونه پيل کړي دي.
په دې ترڅ کې پرون په خوست کې د کورنیو چارو د وزارت د پلاوي مشر غلام محمد راسخ ازادي راډیو ته وویل:
"په ټولنه کې لکه څرنګه چې ډاکتر ته اړتیا شته، پولیس ته هم شته. د پولیسو له موجودیت پرته د قانون تطبیق ګران دی."
په خوست کې ۱۶ ښځینه پولیسې شته او د تشکیلاتو له مخې ۷۵ ښځینه پولیسو ته په دې ولایت کې ضرورت شته.