د عرب لیګ هېوادونو د بهرنیو چارو وزیرانو هغه څه چې دوی یې په سیمه کې د ایران تاوتریخجن عملونه بولي وغندل.
دوی په قاهره کې په یوه فوقالعاده غونډه کې چې د سعودي عربستان په غوښتنه جوړه شوې وه، ټول شوي وو.
د عرب لیګ د بهرنیو چارو وزیرانو غونډه د یمن د جګړې په سر په سیمه کې د دوو سرسختو سیالانو سعودي عربستان او ایران د لانجو له زور اخیستلو سره سم ترسره شوه.
د سعودي عربستان چارواکو په سیمه کې د ایران سرغړونو ته اشاره کړې او ویلي یې دي چې د ایران دا کارونه د سیمې او نړۍ امنیت او ثبات ګواښوي.
د سعودي د بهرنیو چارو وزیر عادلالجبیر د عرب لیګ پرونۍ غونډه کې د ایران کړنو ته په اشارې وویل:
"د ایران د تاوتریخجنو کړنو په وړاندې هر ډول نرم دریځ هغوی د خپلو عملونو دوام ته هڅوي، نو باید موږ سره متحد واوسو."
د عرب لیګ هېوادونو د بهرنیو چارو وزیرانو بېړنۍ غونډه وروسته له هغه وشوه چې د لبنان صدراعظم سعد حریري له ریاضه ناڅاپي استعفا اعلان کړه او اخوا تېره اوونۍ له یمنه حوثي یاغیانو د ریاض هوايي ډګر په یوه توغندي وویشت.