څلور پاکستاني پولیس نن په کوټه ښار کې د طالبانو په یوه ځانمرګي برید کې ووژل شول.
پولیس وايي، برید کوونکو هغه موټر په نښه کړ چې د بلوچستان د پولیسو مرستیال مشر حامد شکیل پهکې وو.
په دې پېښه کې د پولیسو په ګډون نهه تنه ټپیان شوي دي.
پولیس وایي، حامد شکیل په وروستیو کلونو کې د بېلتونپالو کوچنیو ډلو د غړو او یاغیانو په نیولو کې مهمه ونډه لرله.
تر دې برید څو ساعته وروسته پاکستاني طالبانو د دې حملې مسؤلیت واخیست.
پولیسو په یوه اعلامیه کې ویلي چې برید کوونکو له ۱۵ کېلو ګرامه چاودېدونکو موادو کار اخیستی وو.
د پاکستان صدراعظم شاهد خاقان عباسي د یوې اعلامیې په خپرولو سره د دغو افسرانو د وژنې په اړه خواشیني ښودلې ده.