د پاکستان د پوځ لوى درستيز نن ماسپښين په ارګ کې د افغانستان له ولسمشر سره پر ځينو مسايلو خبرې وکړې.
د جمهوري رياست مرستيال وياند نجيب ازاد، د جنرال جاوېد باجوه او محمد اشرف غني د کتنې په اړه ازادۍ راډيو ته وويل: دواړو مشرانو د ټروريزم په وړاندې پر مبارزه او نورو مسايلو خبرې وکړې.
د پاکستان د پوځ لوى درستيز نن په يوه رسمي سفر کابل ته ورسېد.
د افغانستان ولسمشر د پاکستان د هيئت دغه سفر د کابل او اسلام اباد ترمنځ د همکارۍ لپاره نوى فصل بللى دى.
جمهوري رياست په دې اړه په اعلاميه کې ويلي، د پاکستان لوري په کتنه کې ژمنه وکړه، چې د ټروريزم په وړاندې د مبارزې لپاره هر ډول همکارۍ ته چمتو دى.