د افغانستان ولسمشر په نیویارک کې د ملګروملتونو د عمومي غونډې ترڅنګ د هند له بهرنیو چارو وزیرې سوشما سواراج سره وکتل.
په دې کتنه کې چې پرون وشوه، دواړو لورېو د افغانستان او جنوبي اسیا لپاره د امریکا د متحد ایالتونو نوې ستراتیژي د سیمې د ثبات لپاره ګټوره وبلله.
اشرف غني او د هند د بهرنیو چارو وزیرې همدا راز د افغانستان او هند ترمنځ د سوداګرۍ پر پراختیا خبرې وکړې.
ولسمشر غني وویل چې اجرائیه رئیس عبدالله عبدالله به هند ته د خپل راتلونکي سفر پر مهال له هندي سوداګرو او پانګوالو سره د سوداګرۍ د فرصتونو د برابرولو، د کرنې د ودې، د اوبو د مدیریت او د هند او افغانستان ترمنځ د هوایي دهلیز د انکشاف پر لارو چارو خبرې وکړي.