د ارزګان ولایت په مرکز ترینکوټ کې نن شنبه له یو شمېر هغو بې ځايه شویو کورنیو سره د خوارکي او غیرخوارکي توکو مرسته وشوه چې په دې وروستیو کې د وسله والو طالبانو تر ولکې لاندې سیمو ته يې له جنګ جګړو پناه وړې وه.
په دغه ولایت کې د سرې میاشتې خیریه ټولنې مسؤل سید محي الدین صدیقي د یادې مرستې د وېش پرمهال په سیمه کې ازادي راډيو ته وویل چې دغه مرسته يې نن شنبه د ارزګان ولایت مرکز ترینکوټ اړوند ګرم آب او ده کانو په سیمه کې، د۱۱۰هغو بې ځايه شویو کورنیو سره کړې چې په دې وروستویو کې له خپلو سیمو بې ځايه شوې دي.
نوموړی وايي، په یادو مرسته شویو توکو کې ۱۵ قلمه خوراکي او غیر خوراکي توکي شامل دي چې کولای شي، د یوې کورنۍ لومړنۍ اړتیاوې پوره کړي.
ښاغلي صدیقي داهم وویل چې په دغه ولایت کې لا هم سلګونه کورنۍ عاجلو مرستو ته اړتیا لري او په خبره یې چې دوی به خپلې مرستې ورسره جاري وساتي.
د یادونې وړه ده چې څه موده وړاندې هم په دغه ولایت کې د۴۳۰ بې ځایه شویو کورنیو سره د خوارکي اوغیر خوراکي توکو د مرستۍ لړۍ پیل شوې وه.