یو شمېر افغان سیاسي مشران وايي، ولس په خپلو کې یووالی لري، خو ځیني سیاسیون یې له احساساتو ناوړه استفاده کوي.
د شهید د اوونۍ او د احمد شاه مسعود د ترور د شپاړسم تلین د لمانځنې په مناسبت غونډه کې یو شمېر افغان سیاسي مشرانو په خپلو ویناوو کې پر ملي یووالي ټینګار وکړ.
دغه غونډه د شنبې په ورځ، په کابل کې د لویې جرګې په خیمه کې جوړه شوې وه.
غونډې ته د افغان ولسمشر محمد اشرف غني په استول شوي پیغام کې، پر ملي یووالي ټینګارشوی و.
په پیغام کې دا شان راغلي وو، هغوی چې د افغانانو تر منځ نفاق ته لمن وهي، د شهیدانو او د افغانستان د ارمانونو ضد دي.
د افغان حکومت اجرائیه رئیس عبدالله عبدالله هم د روانو کړکېچنو حالاتو د کابو کېدو په هدف، د ملي یووالي ټینګښت تر ټولو مهم وباله.
د افغان حکومت اجرائیه رئیس عبدالله عبدالله
ښاغلي عبدالله وویل:
"هغه څه چې کولای شي افغانستان وژغوري، داسې ملي او اسلامي روحیه ده چې د هېواد هره برخه مو خپله وګڼو او د هرې سیمې خلک مو خپل خلک و ګڼو. "
سږ کال په کابل او نورو ولایتونو کې د شهید اوونۍ د ملي وفاق تر نامه لاندې لمانځل کېږي چې هدف یې ولس ته د یووالي او یو بل ته د متقابل درناوي پیغام رسول ښودل شوي دي.
د سولې د عالي شورا رئیس کریم خلیلي بیا په خپلو خبرو کې وویل، ولس په خپلو کې ستونزه نه لري، خو یو شمېر سیاسیونو، د قلم خاوندانو او عالمانو ولس ته ستونزې جوړې کړې دي.
ښاغلي خلیلي زیاته کړه:
"د افغانستان د خلکو تر منځ اختلاف نشته، له بده مرغه باید ووایم چې سیاسیونو په هر شکل چې یې کولای شول، حد اقل د ځان لپاره له ځینو منفي احساساتو استفاده کړې ده. "
د پخواني ولسمشر حامد کرزي او د جهادي مشر عبدالرب رسول سیاف په خبرو کې د ولس تر منځ د یووالي پر موضوع ټینګار وشو، ښاغلی سیاف وویل، هغوی چې ژبه او قوم د نفاق وسیله ګرځوي، ملي خیانت کوي.
جهادي مشر عبدالرب رسول سیاف
ښاغلی صیاف وایي:
"د ژبې او قوم خوښېدل جرم نه دی، په دې باید ټول واضح پوه شي چې دغه مسئله طبعي ده، خو قوم او ژبه د نفاق وسیله ګرځول ګناه څه چې، ان جنایت دی."
د شهید د اوونۍ د لمانځنې پرمهال، وینا والو یو ځل بیا پر طالبانو غږ وکړ چې افغان وژنه بس کړي او د سولې له بهیر سره یو ځای شي.
د سولې د عالي شورا رئیس کریم خلیلي وویل، که څه هم ملي اررښتونه به د سولې قرباني نه شي، خو سوله په دې معنی هم نه شي کېدای چې د جګړې یو لوری د بل لوري تسلیمي وغواړي.
راپور: محمد حدیث پردېس