په افغانستان کې نن شنبه د احمدشاه مسعود د ترور د شپاړسم کال په مناسبت، عمومي رخصتي ده او رسمي مراسم ترسره کېږي.
د کابل د ګارنېزیون سرپرست قوماندان، جنرال افضل امان بېګا ازادي راډیو ته وویل چې د شهید د اوونۍ د رسمي مراسمو لپاره، ځانګړی امنیتي پلان جوړ شوی دی.
جنرال افضل امان وویل:
"د کابل د ګارنېزیون قوماندانۍ په هغو سیمو کې چې د تهدید امکان و، ښه امنیتي پروګرام جوړ کړی او ان شالله عملي به یې کړي."
احمدشاه مسعود د ۲۰۰۱میلادي کال د سپټمبر میاشتې په نهمه نېټه د تخار ولایت په خواجه بهاالدین ولسوالۍ کې، په بمي چادنه کې ووژل شو.
د نیویارک ټایمز په حواله، پر احمد شاه مسعود حمله دوو کسانو وکړه چې د القاعده شبکې غړي وو او ځانونه یې خبریالان معرفي کړي وو.
ویل کېږي چې دواړه حمله کونکي عرب وو.
احمد شاه مسعود له نوولس سوه دونوي تر شپږنوي میلادي کاله د افغانستان د ملي دفاع وزیر پاتې شوی دی.
هغه د مرګ پر وخت، ۴۸کلن و.
هغه د ډګروال دوست محمد خان زوی، د ۱۳۳۲ هجري لمریز کال د سنبلې به یوولسمه نېټه د پنجشېر په جنګلک سیمه کې زېږېدلی و.
د طالبانو د رژیم تر سقوط وروسته، د افغانستان د اساسي قانون د تصویب لويې جرګې احمد شاه مسعود ته د "ملي اتل" لقب ورکړ.