د افغانستان د سولې عالي شورا د تېر په څېر بیا د اختر په مناسب په خپل پیغام کې پر وسلهوالو مخالفینو په ځانګړي ډول پر طالبانو غږ کړی چې د سولې خبرو ته غاړه کېږدي.
د دغې شورا غړي قاضي محمد امین وقاد د پنجشنبې په ورځ ازادي راډیو ته وویل، د لوی اختر په مناسبت خپل دا پیغام په جدي ډول مطرح کوو.
د سولې شورا غړی قاضي محمد امین وقاد
دی وايي:
"طالبان دې د سولې خبرو ته غاړه کېږدي، دا د دوی عزت او خپلواکي ده، افغان حکومت او ملت به دوی وپالي، د سر په سترګو به ورته هرکلی ووایي، د اختر په ورځو کې په ډېر جدي ډول د سولې پیغام مطرح کوو او له دوی «طالبانو» غوښتنه کوو چې دغه پیغام ته مثبت ځواب ووايي."
بلخوا د وسلهوالو طالبانو مشر هبت الله اخندزاده په خپل اختریز پیغام کې په افغانستان کې د سولې په وړاندې تر ټوبو لوی خنډ د بهرنیو ځواکونو موجودیت ګڼلی دی.
په پیغام کې راغلي چې طالبانو له همدې امله خپل سیاسي دفتر ته د سولهییز حل لارې د موندلو دنده سپارلې ده.
د یادونې ده چې د وسلهوالو طالبانو پخوانیو اختریزو پیغامو ته په کتو د سږني لوی اختر په مناسبت خپور کړي پیغام یو څه نرم او هر اړخېز دی.
په دغه پیغام کې طالبانو له خپلو افرادو غوښتي چې د ملکي تلفاتو د مخنیوي لپاره ډېره هڅه وکړي او دغه شان له سوداګرو او پانګهوال هم غوښتل شوي چې د دوی تر ولکې لاندې سیمو کې پانګونه وکړي.
په ورته وخت کې د افغانستان د ولسي جرګې غړي وايي، لویې شخړې کله هم په جګړو نهدي حل شوې او تجربو ثابته کړې چې د هر ستونزې حل په سوله کې دی.
د دغې جرګې غړی صالح محمد صالح له ازادي راډیو سره په خبرو کې په افغان حکومت او وسلهوالو طالبانو، دواړو غږ وکړ چې د سولې خبرې پيل کړي.
دی وايي:
"له وسلهوالو طالبانو مو غوښتنه دا ده چې د جګړې په ځای د سولې د خبرو لاره خپله کړي، دا به د افغانستان د راتلونکي لپاره یو ښه زیری وي، له دولت نه مو هم غوښتنه دا ده چې د سولې لپاره لاس په کار شي. "
د ولسي جرګې غړی صالح محمد صالح وايي، د لوی اختر په مناسبت د وسلهوالو طالبانو اختریز پیغام ته په کتو، دوی پوه شوي چې جګړه نهشي ګټلی او په دې ډول پیغامونو سره ځان د سولې خبرو ته چمتو کوي.
دا لومړی ځل نهدی چې طالبانو ته په اختر او یا ورته نورو مناسبتونو کې د سولې پیغام ورکول کېږي، بلکې تر دې پخوا هم افغان حکومت په وار- وار له وسلهوالو مخالفینو په ځانګړي ډول طالبانو غوښتي چې د سولې خبرو ته غاړه کېږي، خو طالبانو دا غوښتنې رد کړې دي.
په دې وروستیو کې امریکا د افغانستان او جنوبی اسیا لپاره خپله نوې ستراتېژي اعلان کړه، په دغه ستراتېژۍ کې د ترهګرو له ملاتړ کوونکو هم غوښتل شوې چې د یادو ډلو سره له مرستې او همکارۍ لاس واخلي.
راپور: رحمت الله افغان