د هلمند سیمه ییز چارواکي وايي، د بهرنیو ځواکونو په هوايي حمله کې ۱۶ پولیس وژل شوي او دوه نور ټپیان دي.
د هلمند د والي ویاند عمرځواک د شنبې په ورځ ازادي راډیو ته وویل ګرشک ته د دوی استول شوی هیئت توانېدلی چې د پېښې لمړي عوامل پیدا کړي.
ځواک وویل په دې پېښه کې د پولیسو درې قوماندانان لکه اغا جان، ناصر او محمد ولي د خپلو ۱۳ نورو ملګرو سره وژل شوي دي.
هغه وویل په دې پېښه کې دوه پولیس ټپیان دي چي روغتیايي حالت يې ښه دی.
ځواک د پېښې د علت په اړه ډېر جزئیات ورنه کړل خو زیاته يې کړه د ورکول شو کوردیناتو سیمي ته تر الوتکي وړاندې پولیس رسېدلي دي او په غلط فهمۍ کې پر پوسته برید شوی دی او مرګ ژوبله اوښتې ده.
ځواک وویل د دوی څېړنې لاهم روانې دي.
د ګرشک ولسوالۍ د پولیسو یوې سرچیني بیا د نوم نه ښودلو په شرط ازادي راډیو ته وویل چې په دې حمله کې د ۲ ملکیانو په شمول ۲۲ تنه پولیس وژل شوي دي او دوه نور ټپیان دي.
دا پېښه دا ګرشک د پارچاوې په نوم سیمه کې هغه مهال رامنځته شوې ده چې بهرنیو ځواکونو د هوا له لارې د افغان ځواکونو د عملیاتو ملاتړ کوی.
امریکا یاده حمله تصادفي او خواشینونکې بللې ده.
د امریکا دفاع وزارت ویلي چې په دې اړه څېړنې کوي.