د امریکا متحده ایالاتو او قطر د ترهګرۍ او د ترهګرۍ د مالي سرچینو پر ضد د مبارزې په اړه یو هوکړهلیک لاسلیک کړی دی.
دا هوکړهلیک قطر ته د امریکا د بهرنیو چارو د وزیر رکس ټېلرسن د سفر په ترڅ کې لاسلیک شوی دی.
دا خبره د امریکا د بهرنیو چارو د وزیر سلاکار «ار. سي هامونډ» خبریالانو ته کړې ده.
د امریکا د بهرنیو چارو وزیر رکس ټېلرسن خپله پرون سې شنبه په دوحه کې خبریالانو ته وویل:
"زه نن دلته په قطر کې له هماغې روحیې سره یم چې د مې په میاشت کې په کومه روحیه ولسمشر ټرمپ ریاض ته سفر کړی و، د امریکا متحده ایالات یو هدف لري او هغه دا چې ترهګري د ځمکې له مخ ورکه کړي."
د رکس ټېلرسن سلاکار ښاغلی هامونډ وايي، متحده ایالاتو او قطر په خپلو کې یو داسې تفاهملیک لاسلیک کړ چې پهکې د ترهګرۍ پر ضد د قطر د راتلونکې مبارزې پیاوړتیا او د ترهګرۍ د مالي سرچینو مسئلو ته پام اړول په ګوته شوي دي.
د امریکا د بهرنیو چارو وزیر رکس ټېلرسن دا مهال په خلیج کې دی او هڅه کوي دغلته د قطر او نورو عربي هېوادونو تر منځ وروستی کړکېچ هوار کړي.
له قطر سره د یو شمېر عربي هېوادونو کړکېچ تېره میاشت هغه مهال راپورته شوی چې د سعودي عربستان په مشرۍ څو هېوادونو له قطر سره ټولې اړیکې پرې کړې او پر دې هېواد یې بندیزونه ولګول.
دا هېوادونه په قطر تور پورې کوي چې د سخت دریځو ډلو او د سعودي عربستان له سیمهییز سیال ایران سره اړیکې لري.