د ملي اردو چارواکي وايي په ارزګان او زابل ولايتونو کې په تېرو ٢۴ ساعتونو کې د دولت ١٠ تنه وسله‌وال مخالفین وژل شوي دي.
د ٢٠۵ اتل قول اردو مطبوعاتي سرچينې وايي، دغه وسله‌وال د اتل په نامه د پوځي عملياتو په لړ کې وژل شوي دي.
د دغه قول اردو د ستراتېژيکو ارتباطاتو او عامه چارو مرستيال تورن احمد صادق عيسى نن سهار ازادي راډيو ته وويل:
"اته ترورېستان په ارزګان او ٢ وسله‌وال په زابل ولايت کې وژل شوي دي."
ويل شوي په دغو عملياتو کې يوه اندازه وسله او مهمات هم د ملي اردو لاس ته ورغلي دي.
د ٢٠۵ اتل قول اردو چارواکي وايي، د دوى پوځي عمليات د زابل او ارزګان ولايتونو ترڅنګ د کندهار په څو ولسواليو کې هم روان دي.
د دولت کومې مخالفې ډلې په دې اړه تبصره نه‌ده کړې.