ایران او چین پرون هرمز تنګي ته نژدې پوځي تطبیقات وکړل. دا پوځي تطبیقات په داسې حال کې کېږي چې په خلیج کې د ایران او امریکا د سمندري ځواکونو ترمنځ کړکېچ په زیاتېدو دی.
د ایران رسمي خبري آژانس ایرنا خبر ورکوي چې په دې تطبیقاتو کې د ایران یوې او د چین دوو کښتیو او همدا راز یوې لوژستیکي کشتۍ او یوې چینايۍ هلیکوپټرې برخه درلوده.
ایراني رسنیو راپور ورکړی چې د ایران شاوخوا ۷۰۰ سمندري ځواکونو په پرونیو تطبیقاتو کې برخه درلوده.
دا له ۲۰۱۴ کال وروسته د ایران او چین لومړي سمندري پوځي تطبیقات دي.
د امریکا پوځ د شنبې په ورځ په خلیج کې د قطر له سمندري ځواکونو سره ګډ پوځي تطبیقات وکړل.
د نړۍ له درېیو یوه برخه تیل د هرمز د تنګي له لارې لېږدول کېږي او په خلیج کې د امریکايي او ایراني جنګي کښتیو ترمنځ په تیرو څو کلونو کې څوځلي کړکېچن حالت رامنځته شوی دی.