د افغانستان ولسمشر محمد اشرف غني وايي، له ترورېزم سره د مبارزې لپاره د شانګهاي د غړو هېوادونو د کړنلارې ملاتړ کوي.
ښاغلي غني پرون جمعه د قزاقستان په پلازمېنه استانه کې د شانګهاي د همکاریو سازمان د مشرانو په غونډه کې وویل چې داسې هر اړخیزه کړنلاره به د ترورېزم پرضد په مبارزه کې د سیمې منابع زیات کړي.
د روسیې خبري اژانس "انترفاکس" د ولسمشر غني په حواله لیکلي:
"موږ پوهېږو چې په افغانستان کې د تروریستي ډلو فعالیت ډير زیات محدودېدلائ شي او موږ یې پرضد د چټک عمل له کړنلارې ملاتړکوو."
ښاغلي غني د ترورېزم پرضد د شانګهاي د غړو د کړنلارې د ملاتړترڅنګ، د سیمې په کچه د دوامدارو او سیسټماتیکو مذاکروپر اړتیا ټینګار کړی څو د تروریستي ډلو مالي سرچینې او د هغوی د فعالیت میکانیزم پېدا کړي.
د روسیې ولسمشر ولادیمیر پوتین هم ټینګار کړی چې افغانستان د سیمې د ثبات لپاره مهم ټکی دی.
هغه د افغانانو ترمنځ د سولې پر مذاکرو ټینګار وکړ او ویې ویل چې د شانګهاي سازمان په دې برخه کې خپلې هڅې زیاتولائ شي.
پوتین وړاندیز وکړ چې د شانګهاي د همکارۍ سازمان او افغانستان ترمنځ د تماس ډله چې په ۲۰۰۹میلادي کال کې يې کار ځنډول شوی و، بیا فعاله شي.