د افغانستان لوی درستیز هیله ښکاره کړه چې په کابل کې به د اعتراض کوونکو او حکومت تر منځ د خبرو له لارې ستونزه هواره شي.
ډګر جنرال محمد شریف یفتلي پرون په کابل کې خبري غونډې ته وویل، که دا ستونزه په سولهییز ډول حل نهشوه بیا به امنیتي ځواکونه لاس په کار شي.
ښاغلی یفتلي زیاتوي:
"ښاغلي ولسمشر او د ملي شورا غړو پر دې مسئلې خبرې کړې دي تر څو د تفاهم له لارې دا موضوع هواره شي، که داسې نهشي د افغانستان د قانون له مخې به د هر راز زور زیاتي پر ضد اقدام وشي."
د ملي شورا غړو پرون په ارګ کې پر دې مسئلې له ولسمشر اشرف غني سره خبرې وکړې او تر هغه مخکې د ولسي جرګې په غونډه کې پرېکړه شوې وه چې د دې جرګې یو پلاوی به د اعتراض کوونکو او حکومت تر منځ منځګړیتوب وکړي.
د کابل په ښار کې یو شمېر کسانو د اعتراض په ډول خیمې وهلې دي او د ولسمشر او اجرائیه رئیس د استعفا غوښتنه کوي، دوی وایي چې چارواکي د امنیت په ټینګېدو کې پاتې راغلي دي.