د عدالت نړیواله محکمه به نن د ورځې په اوږدو کې د هند د هغې بېړنۍ غوښتنې په اړه پرېکړه واوروي چې پاکستان دې د هند د سمندري پوځیانو د یوه پخواني افسر اعدام وځنډوي.
د هند د سمندري ځواکونو متقاعد افسر کولبوشان سودهر یادف هند ته د جاسوسۍ په تور په پاکستان کې بندي دی.
په هاګ کې د ملګرو ملتونو د عدالت نړیوالې محکمې ویلي چې نن به د دې محکمې رئیس روني ابراهم د هند د غوښتنې په اړه پرېکړه غرمه مهال په عام محضر کې واوروي.
د مې په پنځلسمه په ملګرو ملتونو کې د هند استازیو په یوه بېړنۍ ناسته کې د یادف لپاره د پاکستان د یوې پوځي محکمې له خوا د مرګ سزا اورول غیر عادلانه کار وباله او ویې ویل چې د یادې قضیې په اړه اسلام اباد د معلوماتو په ورکولو کې نوي ډهلي ته پاتې راغلی دی.
خو پاکستاني چارواکو ویلي چې د هند متقاعد افسر یادف منلې چې د هند له خوا د پاکستان د بېګناه خلکو د وژنې د تمویل لپاره لېږل شوی و.
کولبوشان یادف تېر کال په بلوچستان کې نیول شوی و.
هند ویلي یادف کوم جاسوس نه و بلکې له ایران تښتول شوی و.
د یادف نیول کېدو او هغه ته د مرګ سزا اورولو په دې وروستیو کې د هند او پاکستان تر منځ سړې اړیکې لا پسې خرابې کړي دي.