د حزب اسلامي مشر ګلبدین حکمتیار پر ټولو سیاسي ګوندونو غږ وکړ چې په هېواد کې د سولې راوستلو لپاره له دوې سره یوځای شي.
د حزب اسلامي مشر ګلبدین حکمتیار وايي، په هېواد کې د روانې جګړې د پای ته رسولو يوازينۍ لار د افغانانو په يو موټي کېدو کې نغښتې ده.
ښاغلي حکمتیار د جمعې په ورځ د کابل په غازي لوبغالي کې خپلو زرګونو پلویانو ته د دغو څرګندونو ترڅنګ د نظام پر اوسني ویش هم انتقادونه وکړل.
ښاغلي حکمتیار وویل هغه کسان چې وايي، طالبان ښه او بد نه لري او د اقتدار پر وېش ټینګار کوي په وینا يي چې دا د سولې خلاف شعارونه دي.
نوموړي زیاته کړه:
"هغو ته چې وايي، طالبان ښه او بد نه لري، ټول بد دي او که څوک طالب ته د ورور خطاب وکړي پرې غوسه کېږي، هغوی ته وایم دا د جنګ د دوام شعارونه دي، د سولې خلاف شعارونه دي، د سولې تقاضا داده چې موږ مخالفانو ته دا پیغام ولېږو چې سولې ته چمتو یو په خپل څنګ کې دي منم."
ښاغلي حکمتیار همدارنګه په خپلو څرګندونو کې وویل چې د نظام اوسنی ویش اساسي قانون سره مطابقت نه لري.
حکمتیار.
نوموړي زیاته کړه:
"باید د دولت ټولو مخالفینو ته ووایو چې نظام او حکومت به د ټول ولس او ټولو لوریو په خوښه جوړېږي، پر دې وېش باندې ټينګار مه کوی، دا وېش سپېڅلی وېش نه دی، نه د خدای له لوري وېش دی، نه د ولس له لوري او نه هم د اساسي قانون په مطابق وېش، دا د ښاغلي جان کري وېش دی، دې ته د یوه سپېڅلي وېش په سترګه مه ګورئ."
ښاغلي حکمتیار همدارنګه په ولسمشرۍ ماڼۍ کې هم تېره ورځ وویل چې پر پارلماني نظام باور نه لري او د افغانستان د اوسنيو شرایطو لپاره یې مناسب نه ګڼي.
خو د حکومت اجرائیه مشر عبدالله عبدالله په دغه غونډه کې تېره ورځ وویل چې د ملي يووالي حکومت په ځانګړو شرايطو کې د خلکو د ارادې او رايې پربنسټ رامنځ ته شوى، نو د اساسي قانون او خلکو په وړاندې متعهد دي او د افغانستان خلک به نه ناهيلي کوي.
ښاغلي حکمتیار همدارنګه د جمعې ورځې په وینا کې پر وسله والو طالبانو غږ وکړ چې په هېواد کې د بهرنیانو د حضور پلمې ختمې او د حکومت سره روغې جوړې ته کېني.
په دغه غونډه کې د حکمتیار د زرګونو پلویانو ترڅنګ د اوسني او پخواني حکومت لوړ پوړو چارواکو او ملي شورا غړیو ګډون کړی و.
دغې غونډې ته په وینا کې د کورنيو چارو وزير تاج محمد جاهد وویل چې د حکمتيار راتګ سره د سولې نوى باب پرانیستل شو.
تاج محمد جاهد.
نوموړي زیاته کړه:
"زه باوري یم چې د حکمتيار راتګ سره به په هېواد کې د سولې او ثبات يو نوى باب پرانېستل شي، باوري يم چې موږ به د هېواد له ملي دفاعي ځواکونو څخه دحکمتيار ملاتړ له ځانه سره ولرو."
افغان ولسمشر هم تېره ورځ ویلي کابل ته د ګلبدین حکمتیار له راتګ سره د سولې لپاره ستر ګام اخیستل شوی او دې لارې ته به د بشپړې سولې تر ټینګښت پورې دوام ورکړي.
د ملي وحدت حکومت او حزب اسلامي ترمینځ تېر کال د مېزان په میاشت کې د سولې تفاهم لیک لاسلیک کړی و چې اته میاشتې وروسته یې مشر ګلبدین حکمتیار د تېرې شنبې په ورځ په لغمان ولایت کې راڅرګند شو.
حکمتیار ته بیا د یکشنبې په ورځ په ننګرهار ولایت کې د دولتي چارواکو له خوا هر کلی وویل شو او د پنجشنې په ورځ غرمه مهال کابل ته راورسېد.
افغان کار پوه شامحمود میاخېل د ښاغلي حکمتیار وروستیو څرګندونو ته په اشارې وايي چې اوسنی نظام د وخت د اړتیاوو په اساس رامنځته شوی او باید د حکومت د ملاتړ لپاره کار وشي ترڅو راتلونکو انتخاباتو ته لاره هواره شي.
راپور: ناجیه ساپۍ