د افغانستان د ملي مشارکت ګوند مسؤلین وايي، روسیه، ایران او پاکستان د يو شمېر داخلي کړیو او افرادو په مرسته غواړي افغانستان کې يو بل ناورین رامنځته کړي.
د دغه ګوند مشر نجیبالله کابلي د سې شنبې په ورځ کابل کې د يوې خبري ناستې پر مهال وویل چې دغه درې هېوادونه هېڅکله نهغواړي چې افغانستان کې امنیت راشي او افغانان په سوله کې ژوند وکړي.
د افغانستان د ملي مشارکت ګوند مشر نجیب الله کابلي
نوموړی وايي:
"دغه درې هېوادونه چې هېڅکله نهغواړي افغانان په سوله کې ژوند وکړي او ټول قومونه سره لکه وروڼه واوسي او تاسو بیا د هغوی په لمسون کار کوئ، د افغانستان خلک نور تاسو ته دا اجازه نهدرکوي او که د افغانستان نظام کمزوری کېږي دا د افغانستان د خلکو په خیر نهدی."
ښاغلي کابلي وویل، د ښې حکومتوالۍ او اصلاحاتو برخه کې د ولسمشر پخوانی ځانګړی استازی احمد ضیا مسعود او یو شمېر نور په دې برخه کې له یادو هېوادونو سره په همکارۍ تورنوي.
دی وايي، هر هغه څوک چې د اوسني نظام پر وړاندې پاڅون کوي تر شا یې بهرني لاسونه دي.
خو د احمد ضیا مسعود رسنیز سلاکار اثار حکمیي بیا د ښاغلي کابلي دغه څرګندونې غېر مسؤلانه او له حقیقته لیرې ګڼي.
ښاغلي حکیمي په دې اړه ازادي راډیو ته وویل:
"غېر مسؤلانه څرګندونې يې مطرح کړي، د ښاغلي احمد ضیا او ملګرو بحث او هڅې له روان ناورینه د افغانستان ژغورل دي، د بهرنیو هېوادونو سره د اړیکو او همکارۍ د تور مسئله داسې ده چې سیاسي ډلې یې همېشه په یو بل لګوي."
خو له دې ټولو سره-سره يو شمېر افغان کارپوهان بیا په دې باور دي چې روسیه، ایران، پاکستان او د سیمې يو شمېر نور هېوادونه د خپلو ستراتیژیکو ګټو او سیالیو په خاطر په افغانستان کې د جنګ دوام غواړي.
له دې ډلې فیض محمد ځلاند وايي، سره له دې چې افغانان پهخپله خاوره کې سوله غواړي خو د سیمې هېوادونه د هر سولهییز حرکت په وړاندې خنډونه جوړوي.
فیض محمد ځلاند
ښاغلي ځلاند زیاته کړه:
"د ټولو هيله دا ده چې موږ سوله ولرو خو مګر موږ ګورو چې د هر سولهییز حرکت په وړاندې په سیمهییزه او نړیواله کچه مخالفتونه راولاړېږي او په لوی لاس د جګړې د دوام لپاره دلایل راپيدا کېږي."
ښاغلی ځلاند وايي، افغانستان کې د نیابتي جګړې د ختمولو لپاره په کار ده چې د هر سولهییز حرکت ملاتړ وکړو او وسلهوال مخالفین د خبرو مېز ته کېنوو.
دی وايي، د نړۍ ټول هېوادونه په ځانګړې توګه د سیمې هېوادونه باید په دې پوه شي چې تر کومه په افغانستان کې امن رانهشي دوی هم د سکون ساه نهشي اخیستی.
راپور: واصل وصال