د نړۍ ګڼو معتبرو ورځپاڼو او خپرونو عادي ژوند ته د حزب اسلامي د مشر ګلبدين حکمتيار پر راتګ ليکنې او تبصرې خپرې کړې دي.
ډيجيټل ژورنال «Digital Journal»
کاناډايۍ انلاين خپرونې ډيجيټل ژورنال په دې باب ليکلي، ګلبدين حکمتيار د شنبې په ورځ تر څه باندې ٢٠ کلنې جلاوطنۍ وروسته په عام محضر کې راڅرګند شو.
خپرونې د ښاغلي حکمتيار هغه وينا هم راخيستې چې له وسله والو طالبانو يې د شنبې په ورځ په کې غوښتنه کړې چې خپلې وسلې پر ځمکه کېږدي او د سولې له کاروان سره ملګري شي.
ډيجيټل ژورنال ليکلي، ښاغلي حکمتيار چې سپينه ږيره يې درلوده او توره لنګوټه يې پر سر وه، د شنبې په ورځ په لغمان کې خپلو پلويانو او چارواکو ته په يوه مجلس کې دغه څرګندونې وکړې.
د دې کاناډايۍ خپرونې په حواله ویل شوي، د حزب اسلامي مشر د سولې د هغې موافقې پر اساس چې تېر لمريز کال د افغان حکومت او حزب اسلامي ترمنځ لاسليک شوه، تر څو مياشتنيو مذاکرو وروسته له سياسي بهير سره ملګرى کېږي.
ښاغلي حکمتيار په خپلو خبرو کې نورو دولت ضد وسلهوالو ته په خطاب کې ويلي، د خداى په خاطر له جنګ څخه لاس واخلئ، چې قرباني يې افغانان دي.
ډيجيټل ژورنال خپرونې ليکلي، حکمتيار د نړيوالو مطبوعاتو په باور په ۹۰مه لسيزه کې د کورنۍ جګړې يو مهم لوبغاړى و.
ګلوب ايند مېل «Globe and Mail»
کاناډايۍ ورځپاڼې ګلوب ايند مېل ليکلي، د افغانستان پخوانى جنګسالار ګلبدين حکمتيار چې له ٢٠٠١مېلادي کال وروسته يې ګوند د امريکايي ځواکونو پرضد جګړه کوله، اوس وايي چې په افغانستان کې سوله غواړي.
ورځپاڼه ليکي، ملګرو ملتونو په فبرورۍ مياشت کې د ګلبدين حکمتيار نوم د بنديزونو له لېست څخه لېرې کړ.
په دغه تور لېست کې داعش او القاعده ډلې هم شاملې دي.
انډين اکسپرس «India Express»
هندۍ ورځپاڼې انډين اکسپرس د افغانستان د کرکټ د دوو نامتو لوبغاړو محمد نبي عيسى خېل او راشد خان ارمان په باب ليکنه خپره کړې چې په پام کې ده ورباندې مستند فلم جوړ شي.
د ليکنې په پيل کې راغلي، د هندوستان د بهرنيو چارو وزارت پرېکړه کړې چې د افغانستان د کرکټ د دوو محبوبو لوبغاړو راشد خان او محمد نبي په اړه د مستند فلم جوړولو لپاره له فلم جوړوونکو پروپوزلونه يا پېشنهادونه ترلاسه کړي.
د دې فلم نوم به وي: افغان کرکټران: د ظهور په حال کې ستوري.
دغه فلم به په انګرېزۍ ژبه وي، اوږد ورژن يا اوږده بڼه به يې ۱۰ دقېقې، لنډه به يې ۵ دقېقې او اعلان به يې ٢ دقېقې وي.
چارواکو دغې ورځپاڼې ته ويلي، دغه فلم به د نړيوالو او محلي نندارهچيانو او مينهوالو لپاره وي او پر دې به راڅرخي چې ځوان ليګ سپېنر راشد خان او د افغان ټيم مشهور ال راونډر محمد نبي څنګه خپل سفر له ملي ټيم څخه پيل او ځانونه نړيوال پلاټفورم او بيا په ٢٠١٧مېلادي کال د IPL تر مسابقو ورسول.
انډيا ټودې «India Today»
انډيا ټوډې خپرونې د هند د غوره ليګ يا (IPL) په مسابقو کې د دوو افغان لوبغاړو محمد نبي عيسى خېل او راشد خان ارمان په باب مفصله ليکنه خپره کړې ده.
راشد خان خپرونې ته ويلي، چې ټول افغانستان د هند د غوره ليګ مسابقې ګوري او د خلکو ملاتړ ده ته انرژي ورکوي، څو د کرکټ د شل اووره مسابقو په دغه ټورنمنټ کې له ځانه ښه وړتيا وښيي.
دغه دوه لوبغاړي په سنرايزرز حيدرباد ټيم کې برخه لري چې تېره مسابقه يې د جمعې په ورځ د کېنګز پنجاب ټيم په وړاندې وه.
د خپرونې په حواله، په دې مسابقه کې ١٨ کلن راشد خان ارمان په څلورو اوورونو کې د توپ اچونې په مرسته وتوانېد يو لوبغاړى وسوځوي او يوازې ١٦ منډې ورکړي.
د حيدراباد ټيم بالاخره دغه مسابقه د ٢٦ منډو په توپير وګټله.