د زهرې په نوم د افغان نجونو ارکستر سږ کال د موسیقۍ فري میوز «FreeMuse» په نوم د یوې نړیوالې ادارې کلنۍ جایزه وګټله.
دغه نړیواله اداره چې د ډنمارک په مرکز کوپن هاګن کې د موسیقۍ د ازادۍ الهې یا فري میوز په نوم فعالیت کوي د موسیقۍ هنر په وړاندې د خنډونو او ستونزو د لیرې کېدو په هدف جوړه شوې ده.
د افغانستان د موسیقۍ ملي انسټېټیوټ مشر احمد ناصر سرمست ازادي راډیو ته وویل چې دا جایزه په افغانستان کې یو مثبت بدلون منعکسوي.
ښاغلی سرمست وايي:
"لکه څنګه چې د اروپا په سټېژونو کې د افغان نجونو د ارکسټر حضور ټول هغه منفي انځورونه لهمنځه وړي چې د افغانستان په اړه موجود دي دا په خپله یو مثبت بدلون دی او بل د آزادۍ الهې جایزه هم کولای شي زموږ مسؤلیتونه ډېر کړي او هم یو ځل بیا زموږ مثبت بدلونونه په رسمیت پېژني او اهمیت ورکوي."
د افغان نجونو دغه لومړني ارکستر د جمعې په ورځ د جنورۍ په ۱۹نېټه د سویس په داووس ښار کې د نړیوالې اقتصادي غونډې په پای کې د شاوخوا درې زره کسانو په وړاندې یو ساعت موسیقي وغږوله.
د افغان نجونو دغه ارکستر په دې هنر سره وښودله چې دوی د خپل هېواد پر ځینو ناوړه دودونو او د مرګ پر ګواښونو برلاسي شوي دي.
ښاغلی سرمست وایي، تر اوسه دغه ارکستر یا هنري ډلې د سویس په سفر کې پنځه کنسرتونه اجراء کړي او له نورو هېوادونو څخه هم بلنلیکونه ورته رسېدلي دي.
د افغانستان د موسیقۍ د ملي انسټېټیوټ مشر احمد ناصر سرمست
نوموړی وايي:
"موږ تصمیم لرو چې که امکانات برابر شي په نورو هېوادونو کې هم خپرونې ولرو. که څه هم دا پروګرامونه به وخت وغواړي، خو له نېکهمرغه په تېرو څو ورځو کې موږ ته له مصر، بلجیم او ایټالیا څخه بلنلیکونه راغلي دي."
زهره په افغانستان کې د نجونو لومړنی او یوازنی ارکستر دی چې دوه نیم کاله وړاندې د افغانستان د موسیقۍ د ملي انسټېټیوټ لهخوا جوړ شوی دی چې ۳۰ غړي او دوه ښځینه مشرانې لري.
ښاغلی سرمست په دې اړه چې ولې یې د دې هنري ډلې نوم "زهره" انتخاب کړی دی، وايي:
"زموږ د کلتور په پخوانیو اسطورو کې د دوو خویندو زهرې او ناهید نومونه راغلي دي چې له موسیقۍ سره تړلي دي. د دې لپاره چې دغه ارکستر ته تاریخي تړاو ورکړو د زهرې نوم مو ورکړی او بل دا چې تر اسلام دمخه ادبیاتو کې هم دا زهره د موسیقۍ الهه وه."
زهره د افغانستان د موسیقۍ د ملي انسټېټیوټ له ۱۱ هنري ډلو څخه درېیم لوی ارکستر دی چې د احمد ناصر سرمست په خبره په سیمه کې ساری نهلري.
ښاغلی سرمست وايي:
"کولای شم په ټوله مسؤلیت سرهیې ومنم چې د زهرې ارکستر د افغانستان د موسیقۍ په تاریخ کې یوازنی دی او د سیمې په سطح ویلی شم چې د نجونو یوازنی آرکستر دی چې زموږ هېڅ ګاونډی یې ساری نهلري."
په دغه ارکستر کې ۳۵ نجونې چې عمرونهیې د ۱۳ او ۲۰ کلونو تر منځ دي د موسیقۍ الات غږوي.
دوی د افغانستان له بېوزلو او یا هم بېسرپرسته کورنیو څخه دي چې د افغانستان د موسیقۍ په ملي انسټېټیوټ کې فني او مسلکي درسونه ورښودل کېږي.
د افغانستان موسیقي د شلمې پېړۍ په وروستیو لسیزو کې د جګړو له کبله، له هغه هېواده د موسیقۍ د متخصصینو د وتلو او د طالبانو د تګلارو له کبله چې د واکمنۍ پر مهالیې په افغانستان کې له یوه سره موسیقي بنده کړې وه، سخته ځپل شوې ده.
خو د افغانستان د موسیقۍ ملي انسټېټیوټ وایي، د نورو ارکسترونو په جوړولو سره غواړي په افغانستان کې دغه هنري تشه په تدریج سره راکمه کړي.
د افغانستان د موسیقۍ د ودې لپاره احمد ناصر سرمست زیات کارونه کړي او د همدې هڅو په خاطر په ۱۳۹۱ کال کې د ازادي راډیو د کال غوره شخصیت وټاکل شو.