د کابل - کندهار لویه لار چې پرون ماسپښین بنده شوې وه، تېره شپه بېرته پرانیستل شوه.
د میدان وردګ د والي ویاند عبدالرحمن منګل ازادي راډیو ته وویل چې دا لار د کابل د ارغندۍ او میدان ښار ترمنځ د واورې او یخي له کبله بنده شوې وه.
د دې لارې د بندېدو له کبله په سلګونو موټرونه او بسونه ۶ ساعته منتظر پاتې شول.
د میدان وردګ د والي د ویاند په وینا دا سړک د کابل او میدان وردګ ولایتونو د مسؤلینو په ګډو هڅو پرانیستل شو.
ده دا هم وویل چې د وردګ ولایت له لوري له ماشومانو، ښځو او بوډاګانو سره د مرستې لپاره سیمې ته امبولانسونه هم ولېږل شول.