د افغانستان د عامې روغتیا وزارت وایي، د پولیو یوه بله مثبته پېښه د پکتیکا ولایت په برمل ولسوالۍ کې کشف شوې ده.
د دغه وزارت د پولیو د لهمنځه وړلو د پروګرام مسؤل ډاکټر میوند احمدزي نن ازادي راډيو ته وویل چې د پولیو د دغې نوې پېښې په موندلو سره په هېواد کې ټول ټال ۱۳ مثبتې پېښې په ۲۰۱۶ کال کې رامنځته شوې دي.
نوموړي وویل په پام کې ده چې د پولیو د واکسین کمپاینونه په پراخ او جدي توګه د هېواد بېلابېلو سېمو ته وغځول شي.
تر دې وړاندې د افغانستان د عامې روغتیا وزیر ویلي دغه ویروس تر ډېره د افغانستان هغه ولایتونه ګواښي چې ډیورند کرښې ته نېږدې پراته دي.
روغتیایي چارواکي وایي، تر کومه چې په پاکستان کې د پولیو ویروس مخنیوی ونهشي، په هېواد کې له دې ناروغۍ سره مبارزه به ستونزمنه وي.