په کابل کې د روسیې سفیر "الکساندر مانتيتڅکي" د افغانستان د مشرانو جرګې له رئیس سره په داسې حال کې کتلي چې په دې وروستیو کې له وسلهوالو طالبانو سره د روسیې د همکارۍ موضوع بېلابېل غبرګونونه راپارولي دي.
خو د مشرانو جرګې رئیس فضلالهادي مسلمیار د سې شنبې په ورځ د جرګې په پرانیستونکې وینا کې وویل چې د روسیې سفیر د دوشنبې په ورځ ورسره کتلي او دا موضوعیې رد کړې چې ګنې روسیه له طالبانو سره همکاري لري.
ښاغلي مسلمیار وویل چې د روسیې سفیر له ده سره په کتنه کې ویلي چې د افغانستان لپاره د روسيې ځانګړي استازي ضمير کابلوف وروستۍ څرګندونې ناسم نقل او تعبير شوي دي.
د مشرانو جرګې رئیس فضل هادي مسلمیار
نوموړی وايي:
"پرون ماته د روسیې سفیر راغلی و او غوښتل یې چې د هغو اندېښنو په اړه وضاحت راکړي چې په دې وروستیو کې راپیدا شوي دي، د هغوی په وضاحت کې دا و چې کابلوف داسې کومه خبره نهده کړې چې موږ له طالبانو سره مرستې کوو، بلکې له طالبانو سره یو تماس ټینګ کړی دی هغه هم په دې خاطر چې زموږ یو پیلوټ بندي و او موږ هماغه وخت چې د افغان حکومت د ملي امنیت مشاور سپنتا و، موږ اجازه اخیستې وه او تماس مو نیولی و."
دا په داسې حال کې ده چې څه موده وړاندې د افغانستان لپاره د روسیې ځانګړي استازي د ترکیې له انادولو خبري اژانس سره په خپلو تازه څرګندونو کې ویلي چې روسیه له طالبانو سره په تماس کې ده.
ضمیر کابلوف ویلي طالبان د هغو کسانو پر ضد جنګېږي چې دوی په سوریه کې ورسره په جګړه کې دي او همدا لامل دی چې د دوی ګټې سره نېږدې کوي.
ضمیر کابلوف
خو د ضمیر کابلوف دغه څرګندونې په افغانستان کې د ملي شورا له سخت غبرګون سره مخامخې شوې او همدارنګه په دې وروستیو کې په افغانستان کې د امريکايي او ناټو ځواکونو عمومي قوماندان جنرال جان نېکلسن روسيه او ايران تورن کړي چې په افغانستان کې وسلهوالو طالبانو ته مشروعيت ورکوي او ترې ملاتړ کوي.
د افغانستان بهرنیو چارو وزارت بیا په دې وروستیو کې ویلي چې دوی په دې مسئلې کې بېتفاوت نهدي پاتې شوي او وړاندې تر دې یې په همدې اړه له روسي چارواکو سره خبرې کړي.
په همدې حال کې بیا یو شمېر سیاسي شنونکي وایي، د ضمیر کابلوف وروستۍ څرګندونې د ټولو نړیوالو ملي موازینو خلاف او د افغانستان کورنیو چارو کې ښکاره لاسوهنه وه نو ځکه روسیه اوس نهغواړي چې خپله دغه تېروتنه تائید کړي.
افغان کارپوه مطیعالله خروټی
افغان کارپوه مطیعالله خروټي په دې اړه وویل:
"روسیه نهغواړي چې خپله تېروتنه تائید کړي، نو ځکه اوس د روسیې سفیر له دغې موضوع انکار کړی اما بیا هم داسې شواهد موجود دي چې د افغانستان په جبهاتو کې په ځانګړي ډول ایران سره په سرحدي سیمو کې ایران او روسیه تحرکات لري."
ښاغلي خروټي همدارنګه وویل، که په افغانستان کې د روسیې دغه لاسوهنې پراخې شي دا به د افغانستان جګړه بلې لسیزې ته هم وغځوي.
خو نوموړی افغان حکومت ته وړاندیز کوي چې له روسي چارواکو سره په جدي ډول په دې اړه خبرې وکړي او د هواري اساسي لارې چارې پیدا کړي.
راپور: ناجیه ساپۍ