د افغانستان ولسي جرګې درېیو نورو وزیرانو ته د دوی په غیاب کې د رایې صدوقونه ایښي دي.
د ولسي جرګې دویم منشي عرفان الله عرفان نن ازادي راډیو ته وویل چې ولسي جرګه له اجنډا سره سم خپل چارې مخ ته وړې.
د افغانستان د لوړو او مسلکي تحصیلاتو، عدلیې او د ښار جوړولو وزیرانو ته نن وروسته له هغې د دوی غیاب کې صندوقونه کېښودل شول چې دغه وزیران د ولسي جرګې استضاحیه غونډې ته حاضر نه شول.
ولسي جرګې په تېرو دوو ورځو کې پنځه وزیران سلب اعتماد کړل- وړمه ورځ یې د بهرنیو چارو، فواید عامې او د کار او ټولنیزو چارو وزیران او پرون یې د پوهنې او ټرانسپورټ وزیران په غیاب کې سلب اعتماد کړل خو د مالیې وزیر ته یې برائت ورکړ.