ملګري ملتونه وايي، د نړۍ له هرو ۷ ماشومانو څخه یو يې په داسې سیمه کې ژوند کوي چې هوا يې له حده زیاته ککړه او زهرجنه ده.
د ماشومانو لپاره د ملګرو ملتونو ادارې یا یونېسف په خپل یوه راپور کې ویلي اکثره دا اسیبپذیره ماشومان د جنوبي اسیا هېوادونو دي.
یاده اداره وايي، په نړۍ کې شاوخوا درې سوه میلیونه ماشومان د ککړې او زهرجنې هوا له امله له روغتیايي خطر سره مخامخ دي.
د «ناسا» یا د امریکا د فضايي ادارې تصویرونه ښيي چې شاوخوا ۲۲۰ میلیونه ماشومان د جنوبي اسیا په هغو هېوادونو کې دي چې هوا يې زیاته ککړه ده.
Almost 1 in 7 of world’s children, 300 m, are breathing toxic air - our new report https://t.co/uiH7CeGbUE #pollution #COP22
— UNICEF (@UNICEF) October 31, 2016
د یونېسف اجرائيوي مشر «انتوني لک» ویلي ککړه هوا د نړۍ په سطحه هر کال له پنځه کلونو څخه د کم عمره شاوخوا ۶ لکه ماشومانو د مړینې یو له اصلي علتونو څخه ده.
د نوموړي په وینا ککړه هوا په سکاروي ناروغي یا «نمونیا» د ماشومانو د اخته کېدو یو اصلي لامل دی.
د یونېسف د چاپېریال او اقتصادي چارو کارپوه نیوکلاس ریس چې روېټرز اژانس تهيې په دې اړه راپور برابر کړی ویلي چې د ککړې هوا زیاتره قربانیان بېوزله ماشومان دي.
د روغتیا نړیوال سازمان یا «ډبیلو، اېچ، او» وايي، د چاپېریال ککړوالي او غیر صحي هوا یوازې په ۲۰۱۲ میلادي کال کې درې عشاریه ۷ میلیونه کسان وژلي چې له دې ډلې څخه یو لک او ۲۷ زرهيې ماشومان دي.
د کارخانو، د انرژۍ د بټیو او موټرانو چې د سکرو په شمول له فوسیلي موادو نه ګټه اخلي، دودونه د هوا د ککړوالي لوی علت دی.
یونېسف د نړۍ پر شاوخوا ۲ سوه حکومتونو چې په پام کې ده راتلونکې میاشت د اقلیم د تودوخې په اړه د بحث لپاره په مراکش کې غونډه وکړي، غږ کړی چې د فوسیلي سونګ موادو له کارولو لاس واخلي او په دې توګه هم د روغتیا له ښېګڼې او هم د اقلیمي بدلون د سرعت له کمېدو سره مرسته وکړي.
په انګرېزي ژبه د یونېسف د راپور لوستلو لپاره دغه لېنک کېکاږئ: