د کندز ولایت یو شمېر اوسېدونکي وايي چې د دې ولایت د ښار شاوخوا سیمو کې وسلهوالو طالبانو یو شمېر کورنیو ته خبر ورکړی چې باید له خپلو کورونو ووځي او کورونه دوی ته خالي کړي.
اوسمهال جګړه د کندز ښار په لومړۍ حوزه، سه درک، کابل بندر، د سپین زر فامیلي، ناشر سینما او د ښار شمال لور ته د بالاحصار شاوخوا جریان لري.
کله-کله په ودانیو کې پټ وسلهوال طالبان د کندز ښار په مرکزي چوک ډزې کوي خو افغان امنیتي ځواکونه وايي، د دغو ډزو ځواب په درنو وسلو ورکوي.
د کندز ښار اوسېدونکي وايي چې اوسمهال د دغه ښار خلک د خوراکي توکو او د څښاکو اوبو له نهشتون سره مخامخ دي او له درېيو ورځو راهیسې برېښنا هم قطع ده.
نن چهارشنبه په کندز کې د جګړې درېیمه ورځ ده، له ښاره هغه کورنۍ په وتو دي چې د تېرو درېیو ورځو جګړه کې کورونو کې بند پاتې وو، سلګونه کورنۍ غواړي له کندزه ووځي، له کندزه وتونکي هغه کورنۍ چې له کورنو راوتلي دي د موټرو له کمبود سره مخ دي.
نن چهارشنبه کندز کې د جګړې درېیمه ورځ ده.
د یادونۍ وړ ده چې له جګړې مخکې د کندز-بغلان تر منځ د یوه مسافر کرایه ۱۰۰ افغانۍ وه، خو اوس ان ۵۰۰ افغانۍ شوې، همدارنګه پخوا له کندزه تر کابله د یو مسافر کرایه ۶۰۰ افغانۍ وه خو اوس مهال د کندز-کابل کرایه ۴۰۰۰ زره افغانۍ ته پورته شوې ده.
په ورته وخت کې د کندز د والي ویاند سید محمود دانش بیا وايي چې دغه ولایت ته په کافي اندازه ځواکونه رارسېدلي او هڅې کوي څو د کندز ښار په ۲۴ ساعتونو کې د طالبانو له شتونه پاک کړي.
خو بیا په همدې حال کې ذبیحالله مجاهد چې ځان د وسلهوالو طالبانو ویاند معرفي کوي وايي، د کندز ښار هغه سیمې چې وسلهوالو طالبانو نیولي دي لا هم د دوی په کنټرول کې دي.