وسله والو کسانو د پاکستان په شمال لویدیځ کې د پولیو یا ګوزڼ پر ضد واکسین د کمپاین یو جګ پوړی غړی په ډزو وواژه.
ډاکټر زکاوالله خان د پاکستان د قبایلو ناارامۍ سیمې ته نېږدې د پیښور د پولیو د واکسین د کمپاین غړی و.
هغه پرون خپل کورته نېږدې پر موټر سایکل سپرو وسله والو په ډزو وواژه.
له پاکستاني طالبانو بیلې شوې جماعت الاحرار ډلې د دغې حملې مسؤلیت په غاړه اخېستی.
د دغې ډلې ویاند عصمت الله فرانسپرېس خبري اژانس ته په استولې خبرپاڼه کې ویلي چې نورې حملې به هم ترسره کړي.