د امریکا ولسمشر بارک اوباما وايي، په سوریه کې د افراطي ډلو پر ضد په مبارزه کې د روسیې پر همکارۍ پر حساب کولو شک لري خو غور ورباندې کوي.
ولسمشر اوباما پرون د امریکا په دفاع وزارت پنټاګون کې خبریالانو ته وویل:
"امریکا له روسیې سره ګډو هڅو ته تیاره ده څو په سوریه کې د القاعده او داعش پر ضد زموږ فعالیت لا پیاوړی شي."
خو د ولسمشر اوباما په وینا، روسیه د ډېرو ضروري ګامونو په پورته کولو کې ناکامه شوې او په سیمه کې د وضعیت خرابېدو ته په اشاره یې ټینګار وکړ چې روسیه باید په دې برخه کې خپل جدیت څرګند کړي.