د افغانستان د ملي امنیت شورا وايي، امنیتي او دفاعي ځواکونو ته سپارښتنه شوې چې په لویو لارو کې دمسافرو د برمته نیونې د مخنیوي په هدف له ټولو امکاناتو او ظرفیتونو کارواخلي.
د دغې شورا ویاند تواب غورځنګ نن ازادي راډيو ته وویل د ملي امنیت شورا په دې اړه په یوې اساسي طرحه کار کوي او ډېر ژره به تصویب شي.
ښاغلي غورځنګ زیاته کړه، وسله وال مخالفین هڅه کوي چې په یوه نوي تکیک سر د خلکو ترمنځ قومي شخړه رامنځ ته کړي او په دې سره د جګړې په ډګر کې خپله ماته جبران کړي.
دا په داسې حال کې ده چې په دې وروستیو کې په کندز او غزني ولایتونو کې وسله والو طالبانو یو شمېر مسافر له موټرو ښکته کړي، ځينې یې وژلي، یو شمېر یې خوشې کړي او ځینې یې له ځان سره بیولي دي.