د کندز والې وایي وسله والو طالبانو د کندز ـ تخار پر لویه لاره له دو موټرو څخه ۴۰ سپرلۍ ښکته کړي او نامعلوم ځای ته یې بیولي دي.
اسدالله عمر خېل نن رسنیو ته وویل چې د دغو څلویښتو کسانو له ډلې ۷ تنه د پولیسو لخوا ژغورل شوې دي.
دغه مسافر د یوه ۳۰۳ او یوې سراچې موټر سورلۍ وه چې له تخار څخه کندز ته په لاره نن سهار ۷ بجې له موټرو ښکته کړای شول.
تراوسه طالبانو هم په دې اړه څه نه دي ویلي.
تېره اوونۍ بیا د کندز په علي اباد سیمه کې ورته پېښه کې طالبانو د څلورو بسونو ۱۸۵ سپرلۍ ښکته چې ۱۵۰ یې بیرته آزاد، ۱۳ یې ووژل او د شلو په شااوخوا کې یې له ځان سره بوتلل.
طالبانو هغه مهال وویل چې دوی د امنیتي ارګانونو کارکوونکي برمته کړي، خو د افغانستان د دفاع او کورنیو چارو وزارتونه وایي چې برمته شوي کسان ملکیان دي.