۱۳ پخوانیو امریکايي پوځي مشرانو او ډیپلوماټانو پر ولسمشر بارک اوباما غږ کړی چې په افغانستان کې موجوده ۹زره اته سوه سرتیري په دغه هېواد کې وساتي.
د سي ای اې پخواني مشر ډیوډ پیټریوس، په افغانستان کې د نړیوالو ځواکونو څلورو نورو پخوانیو قومندانانو او په کابل کې د امریکا پینځو پخوانیو سفیرانو ولسمشر اوباما ته په یوه پرانیستي لیک کي ویلي چې په افغانستان کې د امریکايي سرتېرو د شمېر کمول به د افغان امنیتي ځواکونو روحیه کمزورې او د طالبانو مورال لوړ کړي.
دغو پخوانیو امریکايي لوړ رتبه چارواکو دا هم ویلي چې په افغانستان کې په اوسني شمېر کې د امریکايي سرتېرو ساتل به په پاکستان کې د افغانستان په اړه د ځینو ستراتیژي جوړونکو پر ارزونه اغیز ولري.
د سپینې ماڼۍ د اوسني پلان له مخې د ۲۰۱۷ کال په پیل سره به په افغانستان کې د امریکايي سرتېرو شمېرله ۹ زره او اته سوو څخه پینځه نیم زرو ته راټیت شي.