وسله والو طالبانو د خپل پخواني مشر ملا اختر محمد منصور وژنه تایید او د خپل نوی مشر وټاکه.
د طالبانو ویاند ذبیح الله مجاهد نن د یوې خبرپاڼې په خپرولو سره ویلي چې مولوي هبت الله اخندزاده د دوی نوی مشر ټاکل شوی.
خبرپاڼه همدارنګه وایي چې ملا سراج الدین حقاني او د ملا محمد عمر زوی مولوي محمد یعقوب د مرستیالانو په حیث ټاکل شوي دي.
دا ټاکنې وروسته له هغه کېږي چې د شنبې په ورځ د طالبانو پخوانی مشر ملا اختر محمد منصور د امریکایې ځواکونو د بې پلوټه الوتکې په برید کې ووژل شو.
د ارګ یوې معتبرې سرچینې د نوم نه ښودو په شرط ازادي راډیو ته وویل چې افغان حکومت ته د وسله والو طالبانو د رهبري بدلون مهم نه دی او د دې ډلې په وړاندې به خپله پالیسي مخ ته یوسي.