د افغانستان د خواریکښو ګارګرانو او مزدورانو ټولنه وايي امنیت، کار او د کارګرانو هر اړخیزه حقونه د دوی عمده غوښتنې دي.
د دغې ټولنې رئیس لیاقت عادل نن ازادي راډیو ته وویل چې دوی په همدې موخه نن د کابل په حضوري چمن کې یوه اعتراضیه غونډه هم وکړه.
هغه زیاته کړه:
"دغه ورځ چې د کارګرانو نړیوال ورځ ده زموږ هدف له دغه راټولونې او لاریون څخه هم همدا و چې موږ امنیت، کار او د کارګرانو هر اړخیزه حقونه غواړو."
ښاغلی عادل وايي، د کار فرماوو نه یې غوښتنه دا ده چې د کار په ساحه کې د کارګرانو د مزد او هر اړخیزو حقونو په برخه کې پاملرنه وکړي.
د مې لومړۍ د کارګر نړیواله ورځ ده چې د نړۍ په بېلابېلو هېوادونو کې لماځل کېږي.