یوه لوړپوړي اسټرالیايي چارواکي ویلي، هېواد یې له افغانستان سره مرستې او د دې هېواد اقتصادې ودې ته ژمن دی.
له ارګ څخه خپره شوې خبرپاڼه وايي، دا خبره د اسټرالیا ګورنر جنرال پیترکاستروف پرون په کابل کې له ولسمشر غني سره په لیدنه کې کړې ده.
ولسمشر غني په ارزګان ولایت کې د اسټرالیايي ځواکونو د فعالیت او د افغانستان د ځانګړو ځواکونو په روزنه کې د اسټرالیا د پوځیانو د ونډې له کبله د دې هېواد مننه کړې.
اسټرالیا په افغانستان کې د قاطع ماموریت په چوکاټ کې ۱۷۴ سرتېري لري.
د ناټو په مشرۍ قاطع ماموریت په ۲۰۱۵ میلادي کال کې پیل شو او هدف یې افغان امنیتي ځواکونو ته روزنه او سلا مشورې ورکول دي.