د امریکا پوځ په کندز کې د بې سرحده ډاکټرانو پر روغتون د حملې په اړه د خپلو څېړنو پایلې اعلان کړې.
د پوځ د مرکزي قوماندې مشر جنرال جوزف ویتل، وویل چې د دوی څېړنو څرګنده کړه چې دا انساني تېروتنه وه او جنګي جنایت نه شي ګڼل کېدای.
د پېښې په تړاو ۱۶عسکرو ته تنبیه لیکونه ورکړشوي دي.
د افغانستانن حکومت په دې اړه د څېړنو د بشپړېدو هرکلی وکړ.
د سپینې ماڼۍ ویاند جاش ارنسټ پرون جمعه وویل چې رپوټ ولسمشر اوباما هم کتلی دی.
جاش ارنست زیاته کړه:
"د تحقیقاتو نتیجه دا ده چې انساني تېروتنه شوې او دا تراژیدي یې پېښه کړې ده."
په کندز ښار کې د بې سرحده ډاکترانو پر روغتون تېرکال د اکټوبر په درېیمه، د امریکايي ځواکونو په حمله کې لږترلږه ۴۲ تنه ووژل شول.
جنرال وتیل وویل چې د وژل شوو کسانو له کورنیو سره به ۶۰۰۰ ډالر او له زخمیانو سره به ۳۰۰۰ ډالر مرسته ورکړي.
د امریکا حکومت به د دې روغتون د بیارغولو لپاره ۵ نیم میلیون ډالر ولګوي.