د افغانستان د کورنیو چارو وزارت د کابل د لومړۍ امنیتي حوزې د مسولینو دندې په کابل کې د وروستۍ خونړۍ حملې د نه مخنیوي له امله وځنډولې.
د کورنیو چارو وزارت خبرپاڼه وایي، یوه پلاوي ته دنده سپارل شوې څو له هغو مسئولینو څخه هر اړخیز تحقیقات وکړي چې دندې یې ځنډول شوي دي.
په خبرپاڼه کې راغلي د لومړۍ امنیتي حوزې امر، د جنایي جرمونو پر وړاندې د مبارزې مدیر، د ترورېزم پر وړاندې د مبارزې مدیر او د ساحوي ټولي قوماندان هغه امنیتي مسولین دي چې دندې یې ځنډول شوي دي.
د سې شنبې په ورځ د کابل په لومړۍ ناحیه کې حمله له دوه زره لومړي کال راهیسې په مرکز کې له تر ټولو خونړۍ حمله بلل شوې چې له کبله یې څلور شپیته کسان ووژل شول او درې سوه اوه څلویښت تنه ټپیان شول.