د امریکا د بهرنیو چارو وزیر له طالبانو وغوښتل چې په افغانستان کې د تاوتریخوالي د پای ته رسیدو لپاره د سولې په پروسه کې شامل شي.
جان کري دا غوښتنه تېره ورځ په کابل کې د افغانستان له ولسمشر اشرف غني سره په ګډ خبري کانفرانس کې وکړه.
ښاغلي کري زیاته کړه:
"له طالبانو غواړو چې د سولې له پروسې، یوې قانوني پروسې سره یو ځای شي چې په افغانستان کې تاوتریخوالي ته د پای ټکی کیږدي."
امریکا د هغه څلور اړخیزه غونډې غړی دی چې څلور ځله يې په کابل او اسلام اباد کې د افغان حکومت او طالبانو ترمنځ د مستقیمو خبرو د پیل پر لارو چارو خبرې کړي دي.
ټاکل شوې وه چې د افغان حکومت او طالبانو ترمنځ د سولې مستقیمي خبرې په تیره مارچ میاشت کې ترسره شوې وای خو طالبانو دا پلان شوې خبرې رد کړې.
له کابل څخه د کتنې پر مهال د امریکا د بهرنیو چارو وزیر یو ځل بیا د افغان ځواکونو د روزنې او تجهیز په اړه د واشنګټن ژمنه تازه کړه.
ولسمشر اشرف غني هم په دې خبري غونډه کې روان لمریز کال د هر اړخیزو اصلاحاتو کال وباله.
ناټو او زیات شمېر نورو هېوادونو له افغانستان سره خپلې مرستې په دې هېواد کې د لازمو اصلاحاتو په راوستلو پورې تړلي دي.
ولسمشر اشرف غني هم په دې خبري غونډه کې روان لمریز کال د هر اړخیزو اصلاحاتو کال وباله.
ښاغلي غني زیاته کړه:
"له نیکه مرغه د افغانستان ټول خلک د فساد پرضد په مبارزې او اصلاحاتو راوستلو ټینګار کوي.فساد هغه سرطان دی چې د افغانستان سیاسي او اقتصادي وجود يې نه شي زغملای.په عین حال کې له نړیوالو سره زموږ قرارداد د ارزښتونو او هغو حقونو د خوندیتوب پر اساس دی چې اساسي قانون د ټولو افغانانو لپاره ټاکلي دي."
جان کري په داسې وخت کې له کابل کتنه کوي چې په افغانستان کې سیاسي کړکیچونه مخ په زیاتیدو دي.
د جان کري په منځګړتوب د ملي یووالي د حکومت د مشرانو ترمنځ د سیاسي موافقې چې د روان میلادي کال په اوړي کې يې موده پایته رسیږي، پوښتنې او اندېښنې پورته کړي دي.
خو د امریکا د بهرنیو چارو وزیر وویل چې د ملي یووالي د حکومت موافقه په روان کال کې پای ته نه رسیږي بلکې دا سیاسي توافق دی یوې پینځه کلنې دورې لپاره دی.